ishq mein itna asar ho ye zaruri to nahin un ko ab meri khabar ho ye zaruri to nahin gamzan hun main jahan josh-e-junun mein ai dost wo teri rahguzar ho ye zaruri to nahin ashk bhi mere jala sakte hain daman un ka sirf aahon mein asar ho ye zaruri to nahin waqt aata hai to phulon mein basar hoti hai umr kanton pe basar ho ye zaruri to nahin jaan dena to hai aain-e-wafa mein lekin zulm ki tegh pe sar ho ye zaruri to nahin wo to aaghosh-e-tasawwur mein bhi aa sakta hai husn khud pesh-e-nazar ho ye zaruri to nahin un ko pa sakte hain jab khana-e-dil mein 'anwar' chand ki samt safar ho ye zaruri to nahin