ishq mein kaamyab hota hai
jis qadar jo kharab hota hai

us ka jis par itab hota hai
lakh mein intikhab hota hai

husn jab be-naqab hota hai
sara aalam hijab hota hai

nigah-e-iltifat ko roko
shauq-e-taskin kharab hota hai

husn-e-sada-mizaj kya jaane
dil jahan kaamyab hota hai

ishq ka dusra jawab kahan
ishq apna jawab hota hai

zabt kije to ishq mein aksar
zabt na-kaamyab hota hai

un ko qaid-e-naqab se kya kaam
jin ka jalwa naqab hota hai

darmiyan husn-o-ishq ke 'afsun'
ek nazuk hijab hota hai