ishq mein qafila-e-salar nahin chahiye hai
ye to diwar hai diwar nahin chahiye hai

ye to sunti hai faqat dirham-o-dinar ki baat
ye hai duniya ise kirdar nahin chahiye hai

kah diya hai ki mohabbat ki zarurat hai so hai
hum ko is bab mein takrar nahin chahiye hai

hum to apne hi kisi dhyan mein baithe hue hain
khinch lo saya-e-diwar nahin chahiye hai

mujh se mat itne takalluf se mila kar 'mazhar'
chahiye yar adakar nahin chahiye hai