ishq mein zor umr-bhar mara
aaqibat kohkan ne sar mara

nala-e-dil ne khush-nawai mein
tana-e-saut hazar par mara

zakhm pinhan dil-o-jigar mein nahin
na khula kya idhar-udhar mara

mujh ko ghadiyaliyon ne hijr ki raat
be-bajae hue gajar mara

dahne baen malak hain dekh na len
is liye dekh-bhaal kar mara

sadgi par mite hue the yunhi
aur bhi us ne ban-sanwar mara

mar-miton ka pata kahin na laga
be-nishanon ka dhundh ghar mara

chashm-e-tar ne baha ke ju-e-sarishk
mauj-e-dariya ko dhaar par mara

hum wo hain kushta-e-tamanna 'shad'
khwahish-e-dil ko umr-bhar mara