iztirab-e-dil-e-bimar se dar lagta hai
nabz ki surat-e-raftar se dar lagta hai

husn ke ishwa-e-tarrar se dar lagta hai
laghzish-e-fitrat-e-khuddar se dar lagta hai

manzil-e-hashr bahut dur sahi par ab bhi
pursish-e-bakht-e-siyahkar se dar lagta hai

ek alamnak fasana hai junun-e-ulfat
jis ki tafsir ke izhaar se dar lagta hai

jada-e-hosh se hat jaen na mai-kash ke qadam
jam ki garmi-e-raftar se dar lagta hai

ya to namus-e-mohabbat pe tha marna bar-haq
ya to zikr-e-rasan-o-dar se dar lagta hai

rukh badal de na mohabbat ka ye aashufta-sari
e'tibar-e-nigah-e-yar se dar lagta hai

ye aqidat hi kahin darpai-e-azar na ho
sharf-e-pa-bosi-e-aghyar se dar lagta hai

tod dalen na kahin aap mera shisha-e-dil
aap ki shumi-e-guftar se dar lagta hai

gham-o-alam se is darja sarasima hun
ki mujhe aks-e-rukh-e-yar se dar lagta hai

bhul jaun na kahin apni hi hasti ka maqam
aap ki chashm-e-fusun-bar se dar lagta hai

bad-gumani hui is darja dakhil-e-fitrat
un ko ab saya-e-diwar se dar lagta hai

phir barangekhta ho jaen na jazbaat-e-nihan
shoala-samani-e-rukhsar se dar lagta hai

bahami rabt mein ban jae na hadd-e-fasil
ikhtilafat ki diwar se dar lagta hai

kuchh to badle hue haalat se wahshat hai 'azim'
kuchh to bigde hue aasar se dar lagta hai