ja ke pachhtaenge na ja ke bhi pachhtaiyega
aap jate hain wahan achchha chale jaiyega

main kai din hue khud se hi jhagad baitha hun
aap fursat se kisi din mujhe samjhaiyega

main khayalon mein bhatak jata hun baithe baithe
bhej aahat ka sandesa mujhe bulwaiyega

main ne zulmat mein guzare hain kai qarn so aap
raushni se jo main dar jaun na ghabraiyega

main samajhta hun mujhe log samajhte hi nahin
main kisi roz na samjhun to samajh jaiyega

gah ho jata hun main apni ana ka qaidi
main na aaun to phir aa kar mujhe chhudwaega

khair-maqdam ko hai tayyar jahan jaiye aap
han palatna ho to phir mere hi ho jaiyega

mujh se zid hai to phir us zid ko nibhane ke liye
main jo mar jaun to phir aap bhi mar jaiyega

jam-e-jam fikr ka rakhta hai nirale manzar
aap jo dekhte hain duniya ko dikhlaiyega

soch jab yaksan na ho qafila kis kaam ka hai
aap 'ahmad' kahin raste mein hi rah jaiyega