jaane kyun barbaad hona chahta hai
surat-e-farhad hona chahta hai

zehn se aakhir main ab thak haar kar
mera dil aabaad hona chahta hai

aasman wale ye sun kar hans pade
aadmi aazad hona chahta hai

har jagah tamir kar ke ek iram
har koi shaddad hona chahta hai

saneha ye hai ki ek bulbul ka dil
daman-e-sayyaad hona chahta hai

ho ke munsif takht pe ab jalwa-gar
waqif-e-rudad hona chahta hai