jab dil mein ghurur aae to danai bhi kya hai
jab raat andheri ho to binai bhi kya hai

jab dubna thahra hai to tufan ka kise khauf
jab ashk samundar hon to gahrai bhi kya hai

jab zakhm hon sine mein to phir dard hai kya chiz
gulshan mein mere mauj-e-hawa lai bhi kya hai

phir ghair ke har jhut pe karta hai yaqin wo
phir shauq ko sakta hai ki sachchai bhi kya hai

phir umr-e-gurezan ne kaha jao chale jao
kya us se kahoge wahan sunwai bhi kya hai

phir dil ne kaha hans ke wo sahra ho qafas ho
jab us se bichhadna hai to tanhai bhi kya hai

phir zikr mera sun ke kaha us ne 'rais' ek
bas chaak-gareban hai wo saudai bhi kya hai