bekasi hai aur dil nashad hai
ab inhin donon se ghar aabaad hai

ab unhin ki fikr mein sayyaad hai
jin ke naghmon se chaman aabaad hai

jo mujhe barbaad kar ke shad hai
us sitamgar ko mubarakbaad hai

tum ne jo chaha wahi ho kar raha
ye hamari mukhtasar rudad hai

hum ne tum se rakh ke ummid-e-karam
wo sabaq sikha ki ab tak yaad hai

bebasi ban kar na tapke aankh se
dil mein jo ek hasrat-e-fariyaad hai