jab hui khak to iksir hui hai baba
aarzu mitne se tasir hui hai baba

dagh hain qalb-o-jigar chhut gae arbab-e-wafa
zindagi ab mujhe tazir hui hai baba

dard hi chaaragar aur dard hi darman nikla
dard hi dard ki tadbir hui hai baba

koi batla na saka talib-o-mtlub ka farq
yun tariqat ki bhi tabir hui hai baba

karbala dhup hai to pyas hai dariya-e-furaat
ek sadaqat yunhi tahrir hui hai baba

khak par sajda ho qatil ki chhuri shah-rag par
har sada nara-e-takbir hui hai baba

nok neza pe koi bolta quran bhi tha
is tarah se kabhi tafsir hui hai baba