jab jab rafaqaton se guzarna pada mujhe
pur-khar wadiyon mein utarna pada mujhe

ahd-e-taghayyuraat mein jine ke nam par
apni riwayaton se mukarna pada mujhe

dariya ke shor-o-shar se mein khaif na tha magar
sahil ke intishaar se darna pada mujhe

bachpan ke sab nuqush nigahon mein phir gae
kuchh din jo apne ganw thaharna pada mujhe

ek lamha-e-hayat ki tazin ke liye
sadiyon simat simat ke bikharna pada mujhe

us manzil-fareb se guzra hun main jahan
apna bhi e'tibar na karna pada mujhe