jab kabhi dard ke maron ki taraf dekhta hun
main haqiqat mein sitaron ki taraf dekhta hun

dubta hun to mujhe hath kai milte hain
kitni hasrat se kinaron ki taraf dekhta hun

chadaren un ko mayassar hain magar mujh ko nahin
main to sardi mein mazaron ki taraf dekhta hun

kyon rawani liye aaya hai yahan par dariya
fikr hoti hai sawaron ki taraf dekhta hun

ab mere ghar se kahan chand dikhai dega
main ye hasrat liye taron ki taraf dekhta hun

han musibat koi aa jae achanak mujh par
to kahin bhi nahin yaron ki taraf dekhta hun