jab kami aai zara si qahr mein
aa gaya tufan sare bahr mein

jangalon mein hain abhi insan kai
bas rahe hain sanp kitne shahr mein

qatl bhi ikhlas se khali nahin
shahd shamil kar raha hai zahar mein

har koi khoya hua hai zat mein
mast hai gul rang-o-bu ke sehr mein

ghurbaton ki dhup mein dekhega kaun
chand bhi aa jae gar dopahr mein

tha wo kitne panchhiyon ka ek kafil
mar ke phenka gaya jo nahr mein

aankh mein wo ashk le aaya 'khizar'
main ne dekha bahr ko ek dahr mein