har ek dard sanbhaala hai zindagani mein
jhalak raha hai budhapa tabhi jawani mein

mujhe to dhup se bhi is qadar na khauf aaya
mila hai khauf jo ab teri saebani mein

kabhi piya gaya us ko kabhi bahaya gaya
koi bhi farq na tha khun aur pani mein

use nazar ki bhala kaun si kahun manzil
dikhai dene laga zard rang dhani mein

zaban-daraaz to thahre magar yahi sach tha
luta hai shahr ye teri hi pasbani mein

mila na qatra-e-ab-e-baqa samundar se
mili hai maut hamein shahr-e-jawedani mein

ganwa ke umr jise hum sanbhaal lae the
ganwa diya use ek baat ki rawani mein

rukawaten hain ye raste ki ai 'khizar' nadan
jinhen tu manzilen samjha hai be-dhiyani mein