jab khud mein kuchh mila na khad-o-khal ki tarah
kuchh aaine mein dhundh liya baal ki tarah

soi hui hai subh ki talwar jab talak
ye shab hai jugnuon ke liye dhaal ki tarah

kuchh raushni ke dagh ujale ka ek zakhm
kuchh to hai shab ke dil mein zar-o-mal ki tarah

tahrir kar rahi hai meri past tishnagi
jhilon ko paniyon ke bichhe jal ki tarah

nagin hai koi bel shajar ba-khabar nahin
kenchul chadhi ho tan pe agar chhaal ki tarah

phir bhi tamam dagh chhupae na chhup sake
go chandni badan pe rahi shaal ki tarah

bas aaine se ek mulaqat ke sabab
lamhat ho gae hain mah-o-sal ki tarah

tum jhuk gae 'mayank' zamane ke samne
phulon se aur phalon se ladi dal ki tarah