jab mujhe koi dua de muskurane ke liye
main samajhta hun dawa hai gham bhulane ke liye

gham na kha dil na-tawan mushkil masaib dekh kar
hain hawadis aashiqon ko aazmane ke liye

ek tabassum bhi tera kafi hai jaan mahshar talak
hum faqiron ki baqa bigdi banane ke liye

jo piro kar de raha hun motiyon se shaeri
mustaid itna nahin sab kuchh sunane ke liye

ek tamasha sa samajh kar wo kahin chalte bane
raqs karte aae hum jin ko lubhane ke liye

is mohabbat ke chaman mein ek nasheman ki hai chah
gar 'jamali' ko ijazat ho banane ke liye