jab se chaman mein apna hua aashiyan udas
fasl-e-bahaar mein bhi raha gulsitan udas

bazm-e-nashat aish-o-tarab ke maal se
hona tha ho raha hai dil-e-shadman udas

allah re ye daur-e-taraqqi ka madd-o-jazr
hai irtiqa-e-aql se sara jahan udas

ek jam-e-iltifat ki khatir ai saqiya
takte rahe hain teri taraf mai-kashan udas

wo kya payam-e-zist hamein denge dosto
jin ke khayal-o-fikr ki hai dastan udas

ojhal nazar se manzil-e-maqsud dekh kar
ek mir-e-karwan se hua karwan udas

ho kar sharik-e-bazm to 'hamdam' kabhi tha khush
ab jaane kya hua hai ki wo hai yahan udas