jab se hai baad-e-khizan sarsar-e-gham aawara
khushk patton ki tarah rahte hain hum aawara

kuchh to hai baat ki hai mausam-e-gul ke ba-wasf
bu-e-gul bu-e-saba bu-e-sanam aawara

kunj-dar-kunj sitam-khurda ghazalon ko abhi
ta-ba-kai rakkhegi ye lazzat-e-ram aawara

hajla-e-sang-e-sar-e-rah mein na jaane kitne
ru-numai ko hain betab sanam aawara

hai gham-e-zist ka ya soz-e-mohabbat ka sila
aariz-e-gul pe jo hai gauhar-e-nam aawara

rang-e-ariz ko tamazat se bachane ke liye
rukh pe lahraya hua abr-e-karam aawara