jab se tum ne de diya hai dil ka nazrana mujhe
kah rahi hai sari duniya tera diwana mujhe

dosto roko na mujh ko aa raha hun wajd mein
yaad ek muddat pe aaya hai sanam-khana mujhe

rah takta hoga koi mera manzil ke qarib
shab ki tariki mein ai dil rah dikhlana mujhe

aao tanhai mein chal kar dil ki kuchh baaten karen
shahr mein mumkin nahin mil jae farzana mujhe

hosh ki baaten karun kya hosh baqi hai kahan
jab se tum ne kar diya hai apna diwana mujhe

shaikh ji chalte bane hain le ke ahd-e-tark-e-mai
raat bhar kosa karenge jam-o-paimana mujhe

ji mein aata hai 'zafar' main phir chaman ko chhod dun
ras aata hai hamesha se hi virana mujhe