jab se us shokh-e-gul-andam ko uryan dekha
phir gulistan mein na su-e-gul-e-khandan dekha

un ke pahchan ka kal le gaya parda koi
be-naqab aaj sanam ka rukh-e-taban dekha

lendi kutte ki tarah ghair pada rahta hai
dar-e-jaanan pe na sang aur na darban dekha

aqd mein phulon mein dawat mein hain har ja maujud
hum ne na-khwanda sada shaikh ko mehman dekha

kucha-e-zulf-e-sanam mein hai juon ka maskan
qaidiyon se kabhi khali na ye zindan dekha

bech kar mahram-e-zartar kharida us ne
jis pari-ru ne 'inayat' tera diwan dekha