jab talak dam raha hai aankhon mein
ek aalam raha hai aankhon mein

gar ye paiham raha hai aankhon mein
raat bhar nam raha hai aankhon mein

us gul-e-tar ki yaad mein ta-subh
raqs-e-shabnam raha hai aankhon mein

subh-e-rukhsat abhi nahin bhuli
wo saman bas raha hai aankhon mein

dil mein ek umr jis ne shor kiya
wo bahut kam raha hai aankhon mein

kabhi dekhi thi us ki ek jhalak
rang sa jam raha hai aankhon mein