jab teri yaad mein machalta hai
dil sambhaale nahin sambhalta hai

chashm-e-pur-nam pe us ki hairan hun
kaise patthar ka dil pighalta hai

us mein aaya tere shabab ka rang
tere hathon jo jam dhalta hai

mujh tak aane ki rah raushan hai
na jale shama dil to jalta hai

kyon patange ko shama ki hai talash
jalne wala to yun hi jalta hai

daur-e-mai par nigah hai kis ki
mast aankhon ka daur chalta hai

dil mein mere kahan andhera hai
aarzu ka charagh jalta hai

tum ko aae ki ya na aae ras
waqt to karwaten badalta hai

silsile aarzu ke chalte hain
dil ka arman kab nikalta hai

jaisi teri nazar badalti hai
waise duniya ka rukh badalta hai

ladkhadaya to pa gaya manzil
jo bhi sambhla hai hath malta hai

jazba-e-dushmani bhi aaj 'habib'
pahlu-e-dosti mein palta hai