jab us ne guftugu hi se tasir khinch li
main ne bhi mel-jol mein takhir khinch li

pahle to mere hath mein kashkol de diya
phir yun kiya ki waqt ne taswir khinch li

mere gunah kya teri rahmat se badh gae
phir kyon meri duaon se tasir khinch li

dil ne abhi liya hi tha taza hawa mein sans
fauran hi tu ne panw ki zanjir khinch li

ek ikhtilaf-e-rae par is darja barhami
kyon dost tu ne hijr ki shamshir khinch li