jab wahime aawaz ki buniyaad se nikle
ghabrae hue hum sukhan-abaad se nikle

samton ka tayyun to sitaron se hua hai
lekin ye sitare meri fariyaad se nikle

main baith gaya khak pe taswir banane
jo kibr the mujh mein wo teri yaad se nikle

khud ko main bhala zer-e-zamin kaise dabaata
jitne bhi khandar nikle wo aabaad se nikle

dil pahuncha achanak hi tayaqqun ki faza tak
sab wahm-o-guman ishq ki asnad se nikle

main dars use ab koi deta bhi to kaise
pahle se use sare sabaq yaad se nikle