jab wo patthar ho jate hain
hum bhi aazar ho jate hain

ashk samundar ho jate hain
ya phir lashkar ho jate hain

dard jab ehsan kar deta hai
lafz munawwar ho jate hain

khanjar tanha rah jata hai
zakhm bahattar ho jate hain

main kuchh der jo chup rahta hun
log sukhnawar ho jate hain

ek imarat ban jati hai
kitne be-ghar ho jate hain

khwab nahin thakte hain man ke
girwi zewar ho jate hain

shishon se itna mat khelo
shishe khanjar ho jate hain

dil ka khun bahut hota hai
sher to behtar ho jate hain