jahan jahan gae phulon ki anjuman dekhi
mera bahaar se ahd-e-alast hai ai dost

kisi ko pyas ata ho kisi ko jam mile
gham-e-hayat ki ye sarguzisht hai ai dost

is aabru ko teri khu-e-dilbari ki qasam
ye dilbari bhi meri bazgasht hai ai dost

hilal ban ke ayan hain gulab ban ke khile
rah-e-wafa mein yahi pesh-raft hai ai dost

hayat badhti gai parcham-e-wafa le kar
na un ki fath na meri shikast hai ai dost

ab un ki yaad pe bhi hukm-e-imtinai hai
dayar-e-dil mein naya bandobast hai ai dost