na rahnuma na kisi rahzan ki fikr karo
giri hai barq jahan us chaman ki fikr karo

tumhin se husn-e-gulistan tumhin se rang-e-bahaar
saji sajai hui anjuman ki fikr karo

kamand chand sitaron pe dalne walo
daraaz-dasti-e-charkh-e-kuhan ki fikr karo

tum apni kakul-e-ambar-fishan na bikhrao
khirad ke shana-e-mashshata-fan ki fikr karo

ada-e-husn ki masumiyat pe shak na karo
nigah-e-saqi-e-paiman-shikan ki fikr karo

zamin-e-sher-o-sukhan shoala-bar hai 'tasnim'
tum is zamin mein na sher-o-sukhan ki fikr karo