jala ke dil ko rakha subh-o-sham roz-o-shab
mera kamal kamal-e-charagh hai ki nahin

raha hai musht-e-turab-e-azal mera mamba
meri ye khak-e-kamal-e-ayagh hai ki nahin

mujhe banaya sarapa sawal ab to bata
meri talash kamal-e-suragh hai ki nahin

gham-e-wajud ka matam karun to kaise jiyun
magar khuda tere daman pe dagh hai ki nahin

jo kho gaya tera 'ahan' sarab-e-khwahish mein
bhatak na jaen kahin be-dimagh hai ki nahin