jalwa-saman hai rang-o-bu hum se
is chaman ki hai aabru hum se

dars lete hain khush-khirami ka
mauj-e-dariya-o-ab-ju hum se

har sahar bargah-e-shabnam mein
phul milte hain ba-wazu hum se

hum se raushan hai kar-gah-e-sukhan
nafas-e-gul hai mushkbu hum se

shab ki tanhaiyon mein pichhle pahar
chand karta hai guftugu hum se

shahr mein ab hamare charche hain
jagmagate hain kakh-o-ku hum se