jang jitni ho sake dushwar honi chahiye jit hasil ho to lazzat-dar honi chahiye ek aashiq kal salamat shahr mein dekha gaya ye khabar to surkhi-e-akhbar honi chahiye kah rahi hai aaj-kal ghazlen kisi ke ishq mein wo ki jo khud zinat-e-ashaar honi chahiye ishq donon ne kiya tha khud-kushi bas main karun wo bhi marne ke liye tayyar honi chahiye dil ki nadani hi bas kafi nahin hai ishq mein aql bhi thodi bahut bimar honi chahiye pyar hai to hath us ka tham apne hath mein jang hai to hath mein talwar honi chahiye