jaun kya munh le ke main wo bad-guman ho jaega
rang ke udne se ishq us par ayan ho jaega

aish-e-bazm-e-be-khudi josh-e-fughan ho jaega
hum kahan honge jo raaz-e-gham ayan ho jaega

dusra aalam bane to ho sake taskin-e-husn
ab hai jitna ye to sarf-e-imtihan ho jaega

ta-ajal pahunchaegi ye na-tawani hijr mein
zoaf badhte badhte zor-e-na-tawan ho jaega

meri khamoshi ko zalim jor-e-be-ja se na chhed
warna zabt-e-dil teri zid se fughan ho jaega

shauq se ghairon mein jae main na hunga bad-guman
khu-e-bad se khud wo apna pasban ho jaega

dil-nashin hai aalam-e-zauq-e-asiri ka khayal
ab dil-e-sayyaad apna aashiyan ho jaega

gham se mere ghar mein gunjaish nahin hai aish ki
naghma-khwan bhi aaega to nauha-khwan ho jaega

mausam-e-baran mein kyun hai dasht ka qasd ai junun
aaj-kal to dasht apna hi makan ho jaega

khubi-e-guftar se samjhega kaun us ka jawab
hashr sara mahw-e-andaz-e-bayan ho jaega

kya yaqin tha hum jo pahunchenge wahan ai josh-e-ashk
wahm apna badh ke us ka pasban ho jaega

kah sakega kuchh bhi ai 'raghib' na us khamosh se
be-dahan ke samne tu be-zaban ho jaega