jazba-e-nau bhi to hai hasrat-e-nakaam ke sath
khwahish-e-subh ubharti to hai har sham ke sath

ho wo tahsin ke hamrah ki dushnam ke sath
aa to jata hai mera nam tere nam ke sath

tere kuche se bhi guzra hun main ai husn-e-talab
subh ke sath kabhi aur kabhi sham ke sath

mushkilen rah mein aati to bahut hain lekin
yaad kar leta hun main tujh ko har ek gam ke sath

pahle mera tha ye gham ab hai zamane bhar ka
gham bhi gardish mein raha gardish-e-ayyam ke sath

jhumti aati hai khushbu se bhari aati hai
jab bhi aati hai saba aap ke paigham ke sath