jhuti baaten jhute log
sahte rahenge sachche log

hariyali par bolenge
sawan ke sab andhe log

do paise mein mahnge hain
kirdaron ke saste log

meri guzarish kya sunte
unche qad ke chhote log

ghair to aansu pochhenge
dhoka denge apne log

ek jagah kam milte hain
itne sare achchhe log

is jiwan mein ghum chuke
aadhi duniya pure log

barson mein phir dekhenge
bhole-bhaale pyare log

sadiyon pahle hote the
apni dhun ke pakke log

har mahfil mein karte hain
ochhi harakat ochhe log