jidhar nazren uthaen tirgi hai
hamari zindagi kya zindagi hai

ye manzil hai to ai ashab-e-manzil
ye meri ruh mein kya tishnagi hai

ye gham ki intiha hai ya wafa ki
nazar mein pyas honton par hansi hai

ye dil mein dard chamka ya koi yaad
ye kaisi aag ki si raushni hai

khirad ki intiha mujh se na puchho
jab us ki ibtida diwangi hai

use khatra hai sirf ek fasl-e-gul ka
khizan ko kis qadar aasudgi hai