jis ke dil mein koi arman nahin hota hai
meri nazron mein wo insan nahin hota hai

khud-kushi jurm samajhte hain zamane wale
jaan dena koi aasan nahin hota hai

har ghadi dil mein raha karta hai yaadon ka hujum
ye wo ghar hai kabhi viran nahin hota hai

bhuli-bisri hui yaaden bhi rula deti hain
be-sabab koi pareshan nahin hota hai

wahshat-e-dil ka taqaza hai ki bas pyar karo
pyar ke saude mein nuqsan nahin hota hai

umr-bhar ke liye aa jao mere dil mein raho
apne ghar mein koi mehman nahin hota hai

husn-e-akhlaq se man-bap ki khidmat karna
farz to hota hai ehsan nahin hota hai