jis mein ek sahra tha ek diwana tha
soch raha hun wo kis ka afsana tha

khwab to mujh ko mele tak le aae the
nind ke bahar to wo hi virana tha

chadar ke bahar bedari baithi thi
aise mein kya panw mujhe phailana tha

ek akeli nazm thi pure safhe par
nazm tha baqi par jo wo virana tha

raat bana deti thi ek pal yaadon ka
mazi tak yun mera aana jaana tha

'atish' tujh ko naz bahut tha suraj par
sham ke dhalte hi jis ko bujh jaana tha