jis taraf nazar kije wahshaton ka saman hai
zindagi hi kya ab to khwab tak pareshan hai

ek hawa-e-betabi hum ko le udi warna
baal-o-par ke parde mein himmat-e-gurezan hai

ai hawa-e-gham tu ne sab diye bujha dale
phir bhi khalwat-e-jaan mein dur tak charaghan hai

dar-o-gir-e-wahshat mein ab panah kya dhunden
ye zamin daman hai aasman gareban hai

main hun jab talak baqi ye mukalima hoga
ai haqiqat-e-hasti mera nam insan hai