jise hum kah saken apna koi aisa nahin milta
tere hamnam milte hain koi tujh sa nahin milta

mohabbat ke safar mein hain musafir hum musafir tum
hamein manzil nahin milti tumhein rasta nahin milta

kisi ki rukhsati ke baad tanhai ke aalam mein
ghamon ka sath hota hai koi tanha nahin milta

samajh lena koi maqsad hai us ki chaplusi mein
jhuka kar sar koi ikhlas se itna nahin milta

jidhar dekho udhar sach bolne wale hi milte hain
tajjub hai koi is daur mein jhuta nahin milta

talab hai raushni ki to jalao khud diya 'rahi'
bujhane tishnagi pyase ki to dariya nahin milta