jise udan ke badle thakan deta hai
khuda use bhi to unchi udan deta hai

usi ke hisse mein aati hai manzil-e-maqsud
jo har qadam pe yahan imtihan deta hai

ajib baat hai us pe sitam ki barish hai
jo chahta hai tumhein tum pe jaan deta hai

dahak rahi hai yahi aag mere sine mein
qasam wo kha ke bhi jhuta bayan deta hai

mazar-e-husn se aati hai ye sada 'rahi'
wafa pe dekhiye ab kaun jaan deta hai