jit ki aur na haar ki zid hai
dil ko shayad qarar ki zid hai

koi bhi to nahin taaqub mein
jaane kis se farar ki zid hai

hum se kuchh kah rahe hain sannate
par hamein intizar ki zid hai

ishq chahe ki lab ko jam likhe
husn ko inkisar ki zid hai

barha hum ne sangsar kiya
par use e'tibar ki zid hai

ek anjam-e-tai-shuda ke liye
phir khizan ko bahaar ki zid hai

ek bar us se kya milin nazren
dil ko ab bar bar ki zid hai