jitna koi tujh se yar hoga
utna hi kharab o khwar hoga

har roz ho roz-e-id to bhi
tu mujh se na ham-kanar hoga

bas dil itna tadap na chup rah
tujh ko bhi kahin qarar hoga

dekhe jo koi chaman mein tujh ko
gul us ki nazar mein khar hoga

shikwe mein ho jis ke khun ki bu
tera hi wo dil-figar hoga

naseh na ho girya se jo mane
mera wahi gham-gusar hoga

ja yar shitab 'soz' se mil
tera use intizar hoga