jo ahraman se pada wasta mafar na hua
kisi bhi baat pe raazi wo fitna-gar na hua

na socha pahle ye ushshaq kahte phirte hain
karenge kya koi wada wafa agar na hua

ye beda gharq hua jis ki na-khudai mein
wo kah raha hai koi mujh sa dida-war na hua

karen jo wada wo ab das hazar sal ka ho
hazar sal ka dawa to mo'atabar na hua

ye kucha ishq ka hai ishq ka are 'nazmi'
idhar na hoga kabhi yas ka guzar na hua