jo ba-in gham bhi shadman guzri
jaane wo zindagi kahan guzri

dil se andesha-e-khizan na gaya
go bahaaron ke darmiyan guzri

jitni muddat main un se dur raha
utni muddat bala-e-jaan guzri

yaad rakhenge aasman wale
mujh pe jo zer-e-asman guzri

thi mere un ke darmiyan jo baat
wo zamane pe kyun garan guzri

kis ko malum talkhiyan meri
yun to kahne ko shadman guzri

mujh pe guzri jo umr bhar 'shafqat'
wo kisi aur par kahan guzri