jo bhi chahen aap marzi aap ki
jaen aaen aap marzi aap ki

dil lagaen aap marzi aap ki
dil dukhaen aap marzi aap ki

hum bahaen ashk ye apna nasib
muskuraen aap marzi aap ki

imtihan hum ishq ka denge zarur
aazmaen aap marzi aap ki

dard-e-dil se aap ko kya wasta
bas chalaen aap marzi aap ki

shad dil ho gar tumhein hum dekh len
ya rulaen aap marzi aap ki

main to chahunga hamesha aap ko
ab bataen aap marzi aap ki

ab sunaen kis ko 'haidar' haal-e-dil
likh ke jaen aap marzi aap ki