jo bhi tere qarib hai ya-rab
wo jahan ka habib hai ya-rab

koi ghamgin hai koi khush hai
apna apna nasib hai ya-rab

tu hi zahir hai tu hi baatin hai
teri hasti ajib hai ya-rab

jis pe teri nazar na ho aisa
ahl-e-zar bhi gharib hai ya-rab

tu ne qatil bana diya jis ko
wahi mera tabib hai ya-rab

aaj har shakhs ke gale mein kyon
ek nishan-e-salib hai ya-rab

dur nazron se hai jahan ki 'mayank'
wo jo tere qarib hai ya-rab