jo inkar sar ke jhukane ko hai
gila hum se sare zamane ko hai

mayassar hai har-dil-azizi use
murawwat bhi us ki dikhane ko hai

ye qissa hai dil ka na hoga tamam
abhi aur kitna sunane ko hai

naya ek alamiya nai ibtila
khuda bhi hamein aazmane ko hai

ajab hai ye viran sahra yahan
na tinka koi aashiyane ko hai

haram se bhi laute to 'athar-shakil'
safar un ka phir baada-khane ko hai