jo kisi par na hua ho wo sitam ho to kaho
ab nirala koi afsana-e-gham ho to kaho

rahnuma jab na mera naqsh-e-qadam ho to kaho
meri raftar kahin rah mein kam ho to kaho

sharh-e-andoh-e-mohabbat pe tabassum kaisa
ye koi zawiya-e-lutf-o-karam ho to kaho

har jafa gham hai mere zarf ki pahnai mein
mere honton pe kabhi zikr-e-sitam ho to kaho

main ne har zakhm-e-bahaaran ko chhupa rakkha hai
mujh se majruh gulistan ka bharam ho to kaho

un ki takhliq alag aur meri fikr juda
un ka mera koi andaz baham ho to kaho

likh raha hai koi pur-kaif ghazal aaj 'nasir'
bad-numa lafz koi zer-e-qalam ho to kaho