jo likha wo likh diya jaan-e-jaan karun aaj us ka malal kya
tera zikr ho teri baat ho to karun main jag ka khayal kya

mili dam-ba-dam hasin raushni ki hayat meri nikhar gai
tere qurb se tere pyar se ho qarar-e-jaan to kamal kya

abhi sath tha abhi kho gaya abhi tirgi mein dubo gaya
abhi us ki aas na pyas hai to khayal-e-qurb-o-visal kya

rah-e-zindagi hai dhuan dhuan nahin ek kiran ka kahin nishan
main hun be-yaqini ki chhanw mein to numud-e-rang-o-jamal kya

rah-e-ashiqan jo hua sitam kabhi zikr hoga na us ka kam
yunhi hoga tan jo lahu lahu to karun main jang-o-qital kya

teri chah thi tera pyar tha tera qurb tha teri dosti
tu nahin to phir ye hikayaten ye shikayaten ye malal kya

tujhe tujh se main ne talab kiya tujhe lutf-e-jaan ka sabab kiya
ye sitam hai tu ne ghazab kiya to karun main tujh se sawal kya