jo log apne iradon mein jaan rakhte the
buland hausle unchi udan rakhte the

tumhaare pas bhi jin ka koi jawab na tha
sawal hum wo dam-e-imtihan rakhte the

main dil ki baat bhi kahta to kis tarah kahta
gali ke sab dar-o-diwar kan rakhte the

tumhaari bazm se khamosh jo chale aae
wo kam-sukhan bhi to munh mein zaban rakhte the

hamein haqir na samjho tum ai jahan walo
ki hum bhi zer-e-qadam aasman rakhte the