jo log sochte hain wo shayad nahin hun main
bahar nahin hun khud ke hi andar kahin hun main

rakhti hun apne panw zamin par sanbhaal ke
main aasman se nahin ahl-e-zamin hun main

kahte hain log is ko yahan e'timad-e-zat
auron ki to khabar nahin khud ka yaqin hun main

ye zarf hi hai jo kare tayin-e-manzilat
jo ashk tere ponchh de wo aastin hun main

main dast-basta mohar-ba-lab ho ke kya kahun
is bargah-e-ishq mein khasta-jabin hun main

mehr-o-wafa khulus hai jis ki fazaon mein
be-shak usi dayar ki adna makin hun main